Bejaarde egpaar dood geskiet
Sandra (80) en Louis Swanepoel (82)
PRETORIA – ‘n Bejaarde
egpaar is vanmiddag dood in ‘n skietery in hul huis op ‘n kleinhoewe by
Mooiplaats, oos van Pretoria. Die egpaar se seun het op die bebloede
lyke van Louis Swanepoel (82) en sy vrou Sandra (80) afgekom.
Die besonderhede van die voorval is
vaag, maar die polisie het bevestig Johan Swanepoel het omstreeks 12:30
die gru-ontdekking gemaak. Swanepoel snr. is klaarblyklik in die
slaapkamer dood en mev. Swanepoel se lyk is in die gang by die agterdeur
gevind. Swanepoel jnr. het by sy ouers gebly maar het vanoggend vroeg
die huis verlaat.
Volgens Kaptein Marissa van der Merwe,
Boschkop polisiewoordvoerder, is die omstandighede rondom die voorval in
dié stadium van die ondersoek vreemd. Daar moet nog bepaal word of
enigiets uit die huis vermis word. Van der Merwe het besvestig Swanepoel
snr. is weens ‘n skietwond dood maar kon nie sê of mev. Swanepoel ook
geskiet is nie.
‘n Bedroefde Swanepoel jnr. was
laatmiddag nog te geskok om met die media oor die voorval te praat. Hy
het gesê daar was ‘n hegte verhouding tussen hom en sy ouers. Die egpaar
se huis is skaars ‘n kilometer vanaf die Boschkop polisiestasie geleë.
Hulle het die afgelope 33 jaar in die huis gewoon.
Bennie Malan, ‘n polisiereservis, het
gesê Swanepoel snr. was ’n merkwaardige man. “Op 80 het hy sy motor nog
self sy motor onderhou en hy was altyd bereid om ander met herstelwerk
te help.” Mev. Swanepoel was ‘n afgetrede onderwyseres. “Sy was baie
geliefd en het ons kinders opgepas as ons met reserviswerk besig was,’’
het hy gesê.
Van der Merwe was vol lof vir die
buurtwag en sekuriteitsmaatskapy wat in die ongewing aktief is. “Was dit
nie vir hulle nie was ons verlore. Die skielike eskalasie van misdaad
in die omgewing is ongewoon.” Dit is die tweede voorval hierdie week
waarin bejaardes van die omgewing op ‘n geweldadige wyse dood is.
Charles Groenewald is Maandag tydens ‘n
rooftog in sy huis doodgeskiet. Hy het homself probeer verdedig en een
van sy aanvallers, na bewering ‘n polisiereservis van KwaNdebele,
doodgeskiet.- Rekord East
No comments:
Post a Comment